BATURAI PANTUN

STATUS: (BHT-04-Tuan Muda Busu Wahyu)
Salam hangat haja nah barataan! Bapapantunankah kita pulang nah?

ASAM KUINI BUAH RAMBUTAN
BUAH MANGGIS IWAK SALUANG
ULUN KADA WANI WAN TAKUTAN
PIAN NANG MANIS DI AMBIL URANG

[Pambakal-BHT-01]:
Nyaman-nyaman iwak saluang
Dipatuk burung tarbang ka awan
Mun pian kada handak diambil urang
Lakasi badatang larangi jujuran

Fendinata Arya: Suasananya kampung banar nah, lanjutakan za, ulun umpat mandangarakan za!

[John Kenedy Bucek-BHT/02]:
Umpani banjur wan iwak saluang
mambajurnya di di palataran
dimapa akal handak lakas badatang
ulun masih pangangguran

Mayzatul Akmam:
Umpani banjur wan iwak saluang
Banjur dimakan iwak haruan
Amun handak lakas badatang
Minta ae duit awan kawitan

[John Kenedy Bucek-BHT/02]:
Mambanjur kulihan iwak haruan
iwaknya disanga dimakan bacacapan
handak minta duit jujuran wan kuitan
ujar urang tuha bahari talalu mambari supan

[Pambakal-BHT-01]:
Ramania anum ulah cacapan
Pakai mancacap iwak kakapar
Kada papa supan wan kuitan
Asal dapat nang bungas langkar

Muhammad Rj Roza:
iwak sapat iwak haruan
dijamur karing di hari Senin
lamun hati bapadah supan
kaina haja bapacaran

Mayzatul Akmam:
Makan iwak awan cacapan
Iwak nang dimakan iwak saluang
Amun supan minta awan kawitan
Tiringi haja sigaluh manis di ambil urang

[John Kenedy Bucek-BHT/02]:
Buah ramania ulah cacapan
sagan mancacap panggang haruan
tatalu banar kada tahu disupan
handak babini batagih kuitan (duit jujuran)

Muhammad Rj Roza:
bakudap iwak haruan
kacukap iwak sapat
rasa hati handak balamaran
siapakan duit jujuran
tajak sarubung kawa jua ba’orkesan

(Tuan Muda Busu Wahyu-BHT/04):
nyamannya iwak sapat siam
dimakan di higa lawang
mun aku malamar ikam
jujurannya jangan talalu larang

Muhammad Rj Roza: Cong jar kada kawa lagi maulah pantun???? Buntu pikir dah xixixixixixixxi.

[Pambakal-BHT-01]:
Kayapa hari kada tarang
Mun bangun malandau batarusan
Kayapa handak kada larang
Mun ulun jadi rabutan
(Abah juwa mata duitan)

[John Kenedy Bucek-BHT/02]:
hari sudah bamula kamarian
hancapi basiap tulak ka pangajian
nyata haja pian jadi binian rabutan
urang maunting harta kuitan pian

[Pambakal-BHT-01]:
Manis-manis buah jambu
Manis lagi mangga madu
Mun wani manjujur aku
Sabuah tuku sudah manunggu
Akay …tarik manggggggg

Muhammad Rj Roza:
jambu habang batatai nangka
sama manis kadua rasa
bila kena ma’tur acara
hakun ulun jadi pangulunya

[Pambakal-BHT-01]:
pucuk nyiur diulah janur
bulu hayam pina tahambur
kayapa jua handak beatur
jujuran haja balum akur

(Tuan Muda Busu Wahyu-BHT/04):
buah jambu iwak papuyu
dimakan di atas bambu
biar pian manjujur aku sabuah tuku
tapi aku tatap mamilih busu nang mambari’e eskudu

[Pambakal-BHT-01]:
kalat-kalat buah mingkudu
tumbuhnya di higa padu
walau kada dapat eskudu
kutunggu busu sampai ka balu

[Pambakal-BHT-01]:
Napa, manyarah barataaan kah? Wakakkakakkakak

sumber Banua Hujung Tanah

Judul: BATURAI PANTUN
Rating: 100% based on 99999 ratings. 869 user reviews.
Ditulis Oleh Muhammad Mushlih

Terimakasih atas kunjungan Sobat beserta kesediaan Anda membaca artikel ini. Kritik dan Saran sobat dapat sampaikan melalui Kotak komentar dibawah ini.